WE WON, YOU LOST: GET OVER IT.
an answer to all da peepos who tink we donno wassup witchoa “Electoral College Victory” conquest
“we won, you lost. get over it.”
howz dat?
liʻ dat stay anyting new to us po‘e Hawai‘i,
da peepos of dis ‘āina, Hawai‘i.
we know da kine
conquest
‘ai moku
to eat da island
the Kingdom of Hawai’i
da rightful government
started
cuz da ali’i
dey was fighting foʻ dayz,
you know, da kine,
like hundreds
of years.
generations.
no believe me?
try listen da kine mo’olelo, liʻ dat
Kuali’i, Kamehamehanui, Kekaulike, Kahekili, Kalanikūpule, Ke’āo, Kamehameha. Kaumuali’i.
and das jes da moʻ recent Ali’i ‘Ai Moku.
goes back to Umi, Līloa, and dea ancestors.
anʻ everytime one ali’i wen conquer one ʻnodda one,
all da loseahs, anʻ all dea maka’āinana, da commoners,
well,
if you was still alive,
you jesʻ wen
suck it up.
“get over it”
(unless you like try make gorilla warfea)
das how in da kine war.
but aftaʻ Kamehameha wen finally make one kingdom,
DA Kingdom
of Hawai’i,
aftaʻ dat, he wen change evryting from rule of da ‘ihe, da pololū, da lei mānō, da cannon, da musket,
anʻ wen to da rule of
Law.
Like, nobody could make anykine jes cuz dey stay da kine moʻ stronga, o get mo’ da kine backahs and weapons liʻ dat.
anʻ acktuly, Kauikeaouli (das King Kamehameha III, if you neva know) wen make Hawai’i have one of da best kine Constitutions in da world by da 1850ʻs.
so, instead of beefinʻ it out wit spears and daggahs,
dey da kine, dey wen start scrappinʻ in da Courts.
no moʻ soldiers.
lawyahs.
so was supposed foʻ be all fair kine undaʻ da rule of law.
da small buggah suppose foʻ get same rights as da big one.
but kinda, nevah wen come out dat way.
cuz turns out,
money talks.
little guys walks.
so da peepos who had money,
anʻ wanted moʻ money,
AND power
da sugaʻ plantahs, the US missionaries,
dey wen try control da Kingdom trough Hawai’i kine legislacha,
anʻ wen dat wasnʻt good enough
dey wen ovatrow da Queen.
das right,
dey basicully said
fuck da law.
anʻ moʻ worse, dey said SHE was da one trying foʻ break da law.
uhhhh, hellooo.
when you make da kine false kine pretenses,
anʻ MOʻ worse, you park yoah US Marines wit dea guns and cannons pointing at da Palace,
uh, kinda like
ILLEGAL, yeah?
so den
da ones who wen ovatrow da Queen, da real government, da Kingdom,
wen make one “Provisional Government”
as if da Queen wen make one state of emergency and dey had foʻ
step in
anʻ make like dey was da ones taking care of da country, liʻ dat.
an if anyone no like, tough.
get ovah it.
or you goinʻ get shot o trown in prison.
ANʻ,
dea so-called “Provisional” was only “Provisional” until
dey made one new da kine, “Republic”.
dey nevah plan foʻ bring back da Kingdom.
dey wanned foʻ jes total em.
like no chance. pau. foʻ evas.
anʻ da “Republic” was only dea foʻ try foʻ get da US foʻ annex
da Kingdom.
yeah, das right
da KINGDOM
NOT da “Republic”
cuz, by rights
da ovatrow wuz ILLEGAL, and so every ting dey did aftas wuz illegal,
anʻ da Kingdom still nevah stay dead — da KINGDOM wuz still LEGAL!
stay kinda like,
if i rough take yo quatah, anʻ use um foʻ go buy candy,
dat candy not really mine, cuz that quatah wuzʻn even mine.
so, anywayz, da “Republican” government (eh, chy spok da irony, sharp, eh?) wen send one treaty requesting annexation to da US.
but da Hawaiian people,
da ones dat wuz patriotic, loyal to da Kingdom
da ones dat love the land, that love their nation
da po‘e aloha ‘āina
21,000 of ʻem
dey wen make one petition to da US Senate foʻ not foʻ annex us
The Petition Protesting Annexation.
cuz by da LAWS of da US, suppose foʻ annex only by one
Senate majority ratification of a legitimate treaty.
anʻ da Queen wenʻ too.
anʻ guess wat?
da Senate wen REJECT da annexation!!!
howz DAT????
but chy wait, yeah
stay moʻ,
so, instead,
the greedy peepos, da ones dat wanted foʻ guarantee da Hawaiian peepos
nevahʻ goinʻ get deah kingdom back,
dey wenʻ make sneaky kine,
and made one “Joint Resolution” to annex Hawai’i, cuz nevah need as many votes foʻ approve em.
ho, sound jesʻ like today kine.
some ironic, eh?
any wayz
even dohʻ wat dey did wuz totally illegal, nevah mattah.
wen look like Hawai’i wuz one territory of da US.
excepʻ wuzʻn. wuz still da Kingdom.
da Kingdom of Hawai‘i
cuz jusʻ cuz you wen trade your not-yours candy foʻ one da kine baseball card, or pokémon, or watevas,
no make wateva you wen score really yours.
anʻ even moʻ worse,
dey basically wen say
We won, you losʻ
suck ʻem up, suckas
cuz now dat da US wen make like Hawai’i wuz deaʻs,
dey could use anyting foʻ
put us down.
smash us.
anʻ wenʻ keep on going,
wen da US made da Kingdom of Hawai’i one state.
dey wen start foʻ make all da laws foʻ make every ting
moʻ easy foʻ da developahs, bankahs,
construction unions go sneak around da rules anʻ laws,
cuz dey get money. and can influence legislacha.
dey can destroy da ‘āina
our ‘āina
sell it.
make um “kapu” so ka po’e aloha ‘āina no can access dea ‘āina.
anʻ wen we lose in court
we just suppose foʻ
get ova it.
so now we get da USʻs illegal occupation of
da Kingdom of Hawai’i
ANʻ
MO worse
now da US get one illegal president, nevah even win da peoplesʻ majority votes,
anʻ maybe even had russians messinʻ wit da election,
so yeah
we used to
We won, you lost
get ovah it.
except
we not.
anʻ we goinʻ keep lookinʻ for da way foʻ get back
wat wuz stolen
our stolen ‘āina, our stolen Hawai‘i
we not goinʻ away.
‘a‘ole.
no way.
get ova it.
